Otru premiu pa Xabiero Cayarga

L´escritor cangués, afincáu n' Alemaña, gana'l Teodoro Cuesta de Poesía n´asturianu

L´escritor cangués Xabiero Cayarga Rodríguez. Semeya: J. G. CASO

Uviéu, 22 d'Avientu del 2020

JAVIER G. CASO

 

Unu nun escribe n´asturianu davezu, pero güei tenía de facelo. Asina que seyan indulxentes. Y fáigolo pa falar d´un amigu, l' escritor Xabiero Cayarga, que ta acabante de ganar el premiu Teodoro Cuesta de Poesía na so 29 edición, un gallardón que concede l´Ayuntamientu de Mieres del Camín. L´escritor de Cangues d´Onís llevó'l premiu con Mazanes d´Iviernu, la obra cola que se presentó y que competía con otres ventiséis.

Dáse-y bien el Teodoro Cuesta a Xabiero Cayarga. Ya lu ganó n' otres dos ocasiones: nel añu 2000 con Pequeña Europa y nel 2010 con La ñeve del cuquiellu. Falamos d´un premiu de prestixu. A pocu qu' escluquemos na so nómina de premiaos atopamos los meyores escritores en llingua asturiana: Berta Piñán, la actual conseyera de Cultura, ganólu na so primer edición. Amás de Piñán tamién lu conquistaren Xuan Bello, Antón García, Esther Prieto, Marta Mori, Vanessa Gutiérrez, Ánxel Nava, Pablo Texón y dalgún más.

Por supuestu Cayarga ye ún de los meyores escritores n'asturianu. Premios tien munchos. Amás del yá mentáu Teodoro Cuesta, delles obres del cangués, mesmo en narrativa qu'en teatru, merecieron dellos gallardones. Premios aparte, lo de Xabiero Cayarga y la llingua asturiana tien munchu méritu. Asina-y lo fici saber nel momentu de felicitalu va unos díes. El mio amigu vive n´Alemaña dende yá va munchos años. Fala l'alemán y tamién manexa' l castellán, idioma del que da clases, pero escribe na so llingua materna: l´asturianu. Asina caltién bien vivu'l vínculu y la conexón cola so Tierra. Y eso hai que valoralo. 

Xabiero ta lloñe, bien lloñe d´Asturies. Y demientres equí hai xente que desprecia la nuesa llingua, otros como Cayarga cuídenla con ciñu pa que nun desapaeza. Y hai qu' agradeceilo tantu a elli, como a tola xente qu' usa l´asturianu.

Nota: Testu correxíu y ameyoráu pola la periodista Cristina Corte